تاند:(يکشنبه ،د عقرب اتمه) د تخار په چاه آب ولسوالۍ کې د سرو زرو د يوه کان د نړیدو له امله ۵ کان کيندونکي مړه شوي.
د تخار د امنيه قوماندانۍ طالب ویاند عبدالمبین ساپي ويلي چې د مړو شوو کان کیندونکو جسدونه د ولسوالۍ کلينک ته لېږدول شوي.
ویل کیږي، چې مړو شوو کسانو په ناقانونه توګه دغه کان کينده، چې پرې نړیدلی او مړه کړي ېې دي.
په وروستيو کې د کانونو کيندلو ته د طالبانو پاملرنه هم زياته شوې، خو منتقدین ېې دا کار مناسب نه بولي او وايي چې د مسلکي کسانو په نه موجوديت کې به د کانونو اړوند تړونونه او اقدامات هېواد ته په تاوان تمام شي.
طالبان په وروستيو کې د کانونو د عوايدو د زياتېدو خبر ورکوي او دا خپله لویه لاسته راوړنه بولي.