تاند:(شنبه ،د ميزان ۳۰مه) د طالبانو د کورنیو چارو وزارت د تخار ولایت په دشت قلعه ولسوالۍ کې د داعشيانو د يوه مشر په ګډون د دوی د ۴ تنو د وژل کیدو خبر ورکړی.
د طالبانو د ياد شوي وزارت وياند عبدالنافع ټکور وويل:« د داعش ډلې پر یوه پټنځای د دقیقو کشفي معلوماتو پر بنسټ د امنیتي ځواکونو لخوا ځانګړې عملیات ترسره شول چې په ترڅ کې یې درې تنه ووژل شول. په عملیاتو کې د دوی مهم غړی او قومندان (فاروق) هم وژل شوی دی.»
بل لور ته د ایران مهر خبري اژانس، چې د داعش پر وړاندې د طالبانو فعاليتونه له نیږدې څاري، په دې پيښه کې د اشکمش ښار لپاره د طالبانو دامنيې قوماندانۍ د امنيت د آمر محمد صديق د وژل کیدو خبر هم ورکړی.
د طالبانو چارواکو د خپل دغه مقام د وژل کیدو په اړه څه نه دي ويلي.
طالبانو پرون ورځ او تېره شپه د کابل په اتمه ناحیه کې هم د داعش ډلې د يوه مرکز د ختمولو او پکې د وزير اکبرخان جومات د چاودنې او کاج ښوونيز مرکز د خونړيو پيښو د عاملینو د وژلو خبر ورکړی و.
دا په داسې حال کې ده، چې د افغانستان لپاره د امريکا ځانګړي استازي ټام ويسټ په قطر کې د طالبانو د استخباراتو له مشر مولوي عبدالحق وثیق سره د خپلو استخباراتي چارواکو د وروستیو مذاکراتو يو اصلي بحث په افغانستان کې د داعش ډلې پر وړاندې د طالبانو پر مقابلې خبرې ښودلي دي.