تاند:(سې شنبه ،د ميزان ۲۶مه) په افغانستان کې د ټولنيزو رسنيو يو شمېر فعالانو د نومونو د نه خپریدو په شرط تاند وېبپاڼې ته ويلي،چې د طالبانو د استخباراتو ادارې په جبري ډول د طالبانو په پلوۍ تبليغاتو ته مجبورکړي دي.
څو تنه دغه فعالان چې له وېرې نه غواړي نومونه ېې واخیستل شي، زیاتوي چې د طالبانو د استخباراتو اداره په بېلابېلو ولایتونو کې د اطلاعاتو او فرهنګ د رياستونو، ځوانانو چارو آمریتونو او تعلیمي او ورزشي ادارو په همکارۍ د فعالو ځوانانو ليستونه برابر کړي او په پرله پسې ډول ېې د استخباراتو ادارې ته ور غواړي.
سرچېنې زیاتوي، چې د طالبانو استخبارات معمولا د ور غوښتو ځوانانو موبایلونه په دقت سره لټوي او هڅه کوي، چې د دوی منتقدانو او مخالفو رسنيو سره د اړيکو اسناد یې ومومي.
د دغو ځوانانو د شکایت په اساس، د طالبانو د استخباراتو او همکارو ادارو له لوري یې د دوی د تبليغاتي ډلو د همغږۍ لپاره واټسپ ګروپونه جوړ شوي، چې پکې د طالبانو په پلوۍ او د مخالفانو خلاف ېې موضوعات شریکیږي او له ځوانانو څخه ېې د خپريدو غوښتنه کيږي.
دا په داسې حال کې ده، چې په وروستيو کې د طالبانو يو شمېر ادارې او چارواکي ځوانانو ته د ټولنیزو رسنیو د استعمال په اړه ځانګړې غونډې هم جوړوي.
تېره اونۍ د ننګرهار د ورزش ادارې لپاره د طالبانو مسوولینو په دې اړه یوه غونډه بللې وه، چې د طالبانو د لوړو زده کړو د وزارت مرستيال دوکتور لطف الله خيرخوا پکې ځوانانو ته د ټولنیزو رسنیو په اړه لیکچړ ورکړی و.
د طالبانو استخباراتو او نورو ادارو سره په دې اړه په خبرو ونه توانیدو.
طالبانو مخکې له خلکو سره د جبري چلند راپورونه رد کړي او بې بنسټه ګڼلي دي.