تاند(دوشنبه، د میزان ۲۵ مه)د افغانستان د پرزول شوي جمهوري نظام د سترې محکمې وروستی ريیس قانونپوه سيد يوسف حليم د ابوظبۍ په کمپ کې د ۶۲ کلونو په عمر وفات شو.

حلیم د ۲۰۱۵ د جولای په ۲۷ مه (د۱۳۹۴ د زمري په ۵ مه) د سترې محکمې ريیس ټاکل شوی و.

پخواني ولسمشر اشرف غني د قانپوه سیدیوسف حلیم د لوړې په مراسمو کې ویلي و: « د ولسمشر لومړۍ دنده د اساسي قانون د تطبیق څارنه ده، ولسمشر له یوې پیاوړې سترې محکمې پرته، چې پیاوړتیا یې له قانون څخه سرچینه اخلي، دغه دنده نه شي اجرا کولی.»

قانپوه سیدیوسف حلیم مخکې تر دې چې د سترې محکمې رييس وټاکل شي، د عدلیې وزارت د مسلکي مرستیال په توګه دنده ترسره کوله.

دی په ننګرهار ولایت کې زېږېدلی، لومړنۍ زده کړې یې د کابل په نادریه لېسه کې کړي، لیسانس یې د کابل پوهنتون د حقوقو او سیاسي علومو له پوهنځي څخه ترلاسه کړی او ماسټري یې د حقوقو په برخه کې د ایران له ازاد اسلامي پوهنتونه اخیستې ده.

ده شاوخوا ۳۵ کاله پخوا د عدلیې وزارت د فوانینو په ریاست کې دنده پیل کړه او په دغه وزارت کې یې په بیلابیلو پوسټونو کې کار کړی دی. نوموړی تېر کال د طالبانو له واک ته رسیدو وروسته له ګڼو نورو افغانانو سره مهاجر شو او شاوخوا یو کال یې د ابوظبي په کمپ کې تېر کړ.