تاند(یکشنبه، د میزان ۱۷ مه) د افغانستان لپاره د پاکستان ځانګړی استازی محمد صادق خان وايي، پاکستان له افغانستان څخه د ورځې له درې سوه تر څلور سوه کانتینره تازه سره بانجڼ او پیاز واردوي.

صادق خان نن پر خپله ټویټرپاڼه کښلي:«افغان کروندګر له دې سوداګرۍ ډېره ګټه ترلاسه کوي ځکه چې سږ کال دوی ډیر حاصل لري.»

که څه هم سږ کال د وچکالۍ له کبله د افغان کروندګرو حاصل د تیرو کلونو په پرتله کم ښودل کېږي او دغه راز د تیرو درو میاشتو سیلونو په ځانګړي ډول فصلونه او باغونه ویجاړ کړل خو د دې لپاره چې سږ کال له هند څخه پاکستان ته د رومي بانجڼو او نورو سبزیو په وارداتو کې خنډونه پېښ شوي، پاکستان مجبوره شوی چې د افغانستان د پیازو او رومي بانجڼو وارداتو ته لار پرانیزي. کنې پاکستان عموماً د افغانستان د میوو د صادراتو په مهال خپلې پولې بندوي چې له کبله یې د افغان سوداګرو ته ډیر مالي تاوان اوړي.

Pakistan is importing 300 to 400 truckloads of fresh tomatoes and onions from Afghanistan everyday. The Afghan farmers are benefitting from this trade significantly as they had surplus production this year. Pakistan’s crops were destroyed by floods.

— Mohammad Sadiq (@AmbassadorSadiq) October 9, 2022

د افغانستان لپاره د پاکستان د ځانګړي استازي په وینا، په تېرو کلونو کې د پاکستان سبزیجات زیات و او افغانستان ته به یې صادرول، خو سږ کال د پاکستان د سبزیو حاصل د سیلونو له کبله ویجاړ شوی دی.

ده پاکستان ته د افغانستان د پیازو او رومي صادرات دوه اړخیزه ګټه وبلله او غوښتنه یې وکړه چې دا ډول راکړه ورکړه دې تشویق شي.

افغانان وايي چې پاکستان ته د پیازو او رومي بانجڼو د صادراتود زیاتېدو له کبله په کورنیو بازارونو کې د دغو دوو سبزیو بیه لوړه شوې ده.

په تیرو کلونو کې د افغانستان پیاز د هند بازارونو ته صادرېدل.