تاند:(پنجشنبه، د ميزان ۱۳مه) د افغانستان د علومو اکاډمۍ «په عربي خليج کې د پښتنو فرهنګي – ادبي هڅې» په نوم د څېړندوی حمايت الله ښاد علمي – څېړنيز اثر چاپ کړی.
په دې اثر کې چې ۲۵۴ مخونه لري، څېړونکي د عربي خليج په هېوادونو، لکه: بحرين، قطر، متحده عربي امارات، عمان او کويټ کې د پښتنو د مېشتېدنې او دغلته د پښتنو د فرهنګي او ادبي هڅو لاملونه، ځانګړنې، ستونزې او مزاياوې په ښه ډول تشـريح او تحليل کړې دي.
د علومو اکاډمۍ نشراتي برخې د دغه اثر په اړه ليکلي دي:« د مسايلو له وړاندې کولو، تشـريح کولو او تحليلولو څخه يې څرګندېږي چې په ډېرو برخو کې يې د نورو ليکوالو پر ليکل شوو آثارو کره کتنه هم کړې ده او ځينو برخو ته يې د تنقيد په سترګه کتلي دي.»
ويل کيږي، چې تر دې د مخه د دغې موضوع په اړه کومه ځانګړې څېړنه نه وه شوې.
دا کتاب د څېړونکو لپاره په عربي خليج کې د پښتنو د مېشتېدنې، د پښتنو د فرهنګي او ادبي ټولنو د ايجاد او د پښتو ادبياتو د تاريخي بهير د څېړنې په برخه کې کافي معلومات او مواد لري.