تاند:(پنجشنبه ،د ميزان ۱۳مه) د طالبانو د حاکمې ادارې د معادن وزارت په هرات او غور ولايتونو کې د ۸ کانونو د قراردادونو د پلان خبر ورکړی.
د طالبانو د دغه وزارت ویاند عصمت برهان ويلي،چې په دې کانونو کې د «غوري» د اوسپنې کان هم شامل دی.
سرچينه زياتوي،چې د دغه کان لپاره د کورنیو شرکتونو تر څنګ بهرنیو شرکتونو هم خپل وړانديزونه شریک کړي.
د نوموړي په وينا دمګړۍ په افغانستان کې د کانونو شاوخوا ۱۸۰ لوېې او وړې پروژې فعاله دي.
د طالبانو د معادن وزارت ویاند ټینګار کوي،چې چې دوی د کانونو په استخراج کې شفافيت ته ژمن دي او دغه راز د خپلسرو کیندنو مخنیوی یې کړی.
دا څرګندونې په داسې حال کې دي،چې د طالبانو يو شمېر منتقدین د حاکمې ادارې له اډانې د مسلکي کادرونو ویستو ته په پام سره اندیښمن دي،چې د کانونو په حصه کې به غیر مسوولانه او د وطن په زيان پریکړې وشي.
طالبان بيا په دې اړه اندیښنو سره موافق نه دي.