تاند:(دوشنبه ،د ميزان ۱۱مه) په افغانستان کې د ملګرو ملتونو د سرمنشي د ځانګړي استازي دفتر یوناما ویلي،چې د کابل د تېرې جمعې ورځې د ځانمرګي برید تلفات زیات شوي.
دغې ادارې په يوه تازه اعلامیه کې ویلي،چې په دغه برید کې د وژل شويو کسانو شمېر ۴۳ تنو ته لوړ شوی.
سرچینې د پېښې د ټپيانو شمېر ۸۳ تنه ښودلی دی.
نورو سرچينو ويلي،چې تلفات تر دې هم ښايي زيات شي، ځکه د ډېرو ټپيانو روغتيايي حالت د ډاډ وړ نه دی.
دغه برید د کاج په نوم د کانکور ازموینې د چمتووالي پر يوه مرکز ترسره شو،چې ډېرې قربانيان ېې نجونې دي.
یاد شوی تروریستي برید د افغان سیاستوالو او بهرنيو هېوادونو ګڼو غبرګونونو سره مخ شو.
د ملګرو ملتونو امنیت شورا د پېښې د عاملینو د نیولو او مجازات غوښتنه وکړه، خو يو شمېر افغان سیاستوالو او نړيوالو بنسټونو طالبان هېواد ته د امنیت راوستو په ادعاوو کې دروغجن او ناکام وبلل.
د طالبانو ادارې د پېښې د عاملینو د نیولو او مجازات ژمنه کړې ده.