تاند:(يکشنبه ،د ميزان ۱۰مه) د طالبانو د حاکمې ادارې مرکزي قول اردو د پنجشېر لپاره د طالبانو د امنیه قومندانۍ د امنیت آمر حميد خراساني ته د خپلو وسلو د سپارلو امر کړی.
خراساني تېره اونۍ خبر ورکړی و،چې کابل کې ېې د طالبانو خلاف د پنجشېر د مقاومت ډلې ځينې کسان نيولي.
په ورته وخت کې ځینو سرچینو تاند ته ویلي،چې نيول شوي کسان د مقاومت ډلې اړوند نه وو.
د سرچينو د معلوماتو له مخې، یاد شوي کسان خراساني د شخصي عقدې او باج اخيستو لپاره نيولي.
دا په داسې حال کې ده،چې نن خراساني په یوه غږیز پيغام کې د طالبانو د مرکزي قول اردو له قومندان شېخ مطیع څخه شکایت کړی.
خراساني ویلي،چې شېخ مطیع په دوه ورځو کې د وسلو سپارلو امر ورته کړی او خبرداری یې ورکړی،چې حساب به ورسره کوي.
حميد خراساني د طالبانو له مشرانو غوښتي،چې مرسته ورسره وکړي او د ده په ټکیو له ورسره کيدونکي ظلم څخه ېې وژغوري.
خراساني په دې پيغام کې د طالبانو د کورنیو چارو وزیر مولوي سراج الدين حقاني خپل امیر ګڼلی او ويلي،چې له هغه پرته بل چا ته ځواب ویونکی نه دی.
هغه له دې هم پرده پورته کړې،چې طالبانو د خپلې واکمنۍ په يوه کلنه دوره کې د ده وسله والو ته معاشونه نه دي ورکړي او د څه شي حساب ورڅخه غواړي.
خراساني د طالبانو له لوري ورسره کیدونکی چلند قومي تبعيض ګڼلی او زياته کړې،چې د شېخ مطیع پر وړاندې به وجنګیږي.
په کابل کې یوه باخبره سرچينه وايي،چې د طالبانو مشرانو ته په وروستيو کې د حميد خراساني له باج اخيستو او نورو ظلمونو څخه ډېر شکایتونه شوي.
ويل کيږي،چې طالب مشرانو د نوموړي د اصلاح ډېرې هڅې کړي، خو اوس ورڅخه نهيلي شوي او بې وسلې کول یې غوره لاره بولي.
د طالبانو وياندويانو د دوی د دغې خپلمنځي ناندرۍ په اړه څه نه دي ويلي.
حمید خراساني د جمهوري نظام پر مهال په کابل کې په پراخو باج اخيستو، وژنو او جرمونو تورن و.
هغه یو ځل په يوه ويډيو کليپ کې د افغانستان ملي بيرغ او تاریخ ته سپکاوی هم کړی او د پښتنو اړوند ېې بللی و.
خراساني د جمهوري نظام په وروستيو وختونو کې پنجشېر ته د يو شمېر ورتلونکو کوچیانو ویډیو ګانې خپرې کړې وې،چې دوی یې د پښتنو او طالبانو په نامه پکې ډبول.
د طالبانو له واکمنيدو سره نوموړي ته د يوه لوړپوړي قومندان په توګه دنده ورکولو او وروسته بيا-بیا په ټولنیزو رسنیو کې د طالبانو د يوه خپلمنځي باغي په توګه د خراساني څرګندیدو ډېر خلک قهرولي دي.