تاند(یکشنبه، د میزان ۱۰) د اندونیزیا د جاوا د فوټبال په یوه لوبغالي کې د خلکو د ګڼې ګوڼې له کبله لږترلږه ۱۷۴ تنه مړه شوي دي.
چارواکو نن وویل دا پېښه هغه مهال وشوه چې پولیسو د بلواکوونکو خلاف له اوښکي بهیونکي ګازه کار واخیست.
په دې پېښه کې لږترلږه ۱۸۰ تنه نور ژوبل شوي دي.
د جاوا د ختیځې برخې د پولیسو یوه چارواکي نیکو افینتا ویلي چې پولیسو وروسته له دې له اوښکي بهیونکي ګازه کار واخیست چې په لوبغالي کې ګډوډي پیل شوه او له کبله یې د نندارچیانو په ګڼه ګوڼه کې ځینې کسان تر پښو لاندې شول او د ځینو نورو سا بنده شوه.
د ده په وینا په دې پېښه کې دوه پولیس هم مړه شوي دي.
د افینتا په وینا، ۳۴ تنو په لوبغالي کې او نورو په روغتون کې سا ورکړې ده.
د اندونیزیا د فوټبال فدراسیون ویلي چې په دې اړه یې پلټنې پیل کړي او دې پېښې د اندونیزیا د فوټبال تصویر خراب کړی دی.
د اندونیزیا د فوټبال غوره لیګ له دې پېښې وروسته د یوې اوونۍ لپاره ځنډول شوی دی.