تاند:( پنجشنبه ،د سنبلې ۳۱ مه) د طالبانو د تر ټولو ستر ملاتړي هېواد پاکستان د بهرنیو چارو وزیر بلاول بوټو زرداري پر دوی نيوکه کړې،چې نړيوالو سره خپلې ژمنې نه عملي کوي او دا کار ېې د نړيوال مشروعيت پیدا کولو پر وړاندې اساسي خنډ ګرځیدلی.
بلاول بوټو يوه فرانسوي ټلویزیون سره د مرکې پر مهال د نجونو زده کړو سره د طالبانو په مخالفت خواشیني څرګنده کړې ده.
طالبانو د پاکستاني خارجه وزير په څرګندونو غبرګون نه دی ښودلی.
نن د افغانستان د پوهنې وزارت پخواني وياند کبير حقمل ويلي،چې د طالبانو د ممانعت په ګډون په بېلابېلو عواملو څه باندې څلور میلیونه د زده کړو پر شرايطو برابرې افغان نجونې له زده کړو څخه محرومې دي.
د طالبانو د مشرانو په اړه پرله پسې راپورونه وايي،چې د دوی لوڼې په کابل کې د پټو زده کړو تر څنګ په قطر، پاکستان او متحده عربي اماراتو کې زده کړې کوي.
څه موده مخکې د پکتيا قومي مشرانو د ولسي پریکړې په اساس د دغه ولايت يو شمېر ښځينه ښوونځي،چې له شپږم ټولګي څخه پورته تدريس پکې کیده او طالبانو تړلي وو، بیرته پرانیستل، خو طالبانو ښوونځي بيرته وتړل او د پرانيستلو لپاره یې ښځینه لاريون والې بنديانې کړې.
ويل کيږي،چې د نجونو د زده کړو مخالفت د طالبانو لوی مشر ملا هبت الله اخندزاده، رييس الوزرا ملا حسن اخند او د دوی نيږدې ډله کوي.
د لوېې پکتيا د طالبانو په اړه،چې مشري ېې مولوي سراج الدين حقاني کوي، ويل کيږي چې د لوی کندهار طالبانو سره د نجونو د ښوونځيو په اړه د نظر اختلافات په ژوريدو دي.
ستاسو په شرمېدلي لوی ملا هبټ او ملا حسن د لعنت وي چې افغانستان مو د ټولې نړۍ پرضد درولی . دوی د علم او پوهې دښمنان د منځنیو پېړیو تورمخي جاهلان د اسلام او قرآن دښمنان دي .
. حدیث شریف
طلب العلم فريضة على كل مسلم، ومسلمة