تاند (پنجشنبه، د سنبلې ۳۰ مه) د استرالیا له جنوبه کابو ۲۵۰ کیلومتره لېرې د یوه ټاپو غاړو ته شاوخوا ۲۳۰ نهنګان ورغلي او په خټو کې بند شوي دي.
د ګارډین ورځپاڼې د راپور له مخې، دا نهنګان، چې د سمندر له اوبو راوتلي، د تاسمانیې ټاپو په لوېدیځ ساحل کې بند پاتې دي.
د تاسمانیې ایالت د چاپېریال ساتنې ادارې ویلي، داسې ښکاري چې تراوسه پورې د دغو نهنګانو نیمايي لا ژوندي دي.
د دې ادارې د چارواکو په وینا، یو شمېر متخصصان او د اوبژویو ساتونکي یې له وسایلو سره سیمې ته استولي.
دوه کاله پخوا په همدغو ورځو د سمندر له ژورو برخو د تاسمانیې ټاپو همدې ځای ته سلګونه نهنګان راغلي او په خټو کې بند شوي وو.
د ۲۰۲۰ د سپټمبر په ۲۲ مه له سمندر څخه د تاسمانيې غاړو ته له ورغلیو نهنګانو، چې شمېر یې ۴۷۰ وو، یوازې ۱۱۱ ژوندي پاتې او سمندر ته بېرته واستول شول خو نور یې مړه شول.
د دې سیمې اوبه دومره ژورې نه دي چې نهنګان دې پکې پټ شي او له همدې کبله دې ځای ته د نهنګانو دوزخ وايي.