تاند:( چار شنبه،د سنبلې ۳۰مه) د طالبانو د حاکمې ادارې دفاع وزارت وايي،چې د خپل مشرتابه په لارښوونه ېې د بګرام هوايي ډګر د فعالولو، بیارغونې او پاکولو چارې پرون د ملي انجینرۍ لوا د پرسونل له خوا پیل کړي دي.
د وزارت د خبرپاڼې له مخې ،د انجنیرۍ ملي لوا مسلکي او تخنیکي ټیم هڅه کوي، چې په شته امکاناتو سره دغه ډګر ژر تر ژره ګټې اخیستنې ته چمتو کړي.
سرچينه زياتوي:«د بګرام هوايي ډګر له هغه وروسته غیر فعال شو، چې بهرنیو ځواکونو له هېواده د وتلو پر مهال د دغه هوايي دګر په ګډون د هېواد یو شمېر هوايي ډګرونو وسایل او ځینې ودانۍ ویجاړې کړې.»
د طالبانو اداره وايي،چې پر افغانستان له بیا واکمنيدو وروسته ېې د کابل، کندهار، هرات او مزارشریف په ګډون یو شمېر هوايي ډګرونه بېرته فعال او ګټې اخیستنې ته سپارلي.