تاند:( چار شنبه،د سنبلې ۳۰مه) د طالبانو د حاکمې ادارې چارواکي وايي چې په پکتیا کې د رحیم ګردېزې د جلغوزیو د پروسس له فابریکې څخه د رحیم ګردیزي په لوګو اتلس ټنه پروسس شوي جلغوزي ایټالیې هېواد ته صادرېږي.
د طالبانو تر کنټرول لاندې باختر خبري اژانس په دې اړه نور جزییات نه دي ورکړي،خو وایي د جلغوزیو د صادرېدو دغه بهیر پيل شوی.
بهرنيو هېوادونو، په خاص ډول چين ته د افغانستان د جلغوزیو صادرات د بې واکه شوي ولسمشر محمد اشرف غني د واکمنۍ پر مهال پيل شو، چې د افغانستان اقتصاد ته له ګټورو اقداماتو وبلل شو.
د طالبانو له واکمنيدو سره د افغانستان سوداګرۍ او په خاص ډول صادراتو ته ډېره صدمه رسيدلې.
سره له دې،چې د طالبانو چارواکو چینایي چارواکو سره بيا-بیا د جلغوزیو صادراتو د بيا پيل په اړه د خبرو خبر ورکړی،خو په دې اړه تر اوسه عملي ګامونه نه اخيستل شوي.