تاند:( شنبه،د سنبلې شپږ ويشتمه) د روسیې یوه لوړپوړي پوځي مقام ‏آنتونی سیدوروف د افغانستان په شمال کې د ۴۰۰داعشیانو د ځای پر ځای کیدو ادعا کړې ده.

نوموړي بادغیس، جوزجان، کندوز، تخار او بدخشان هغه ولایتونه ياد کړي،چې دغه داعشي جنګیالي ورته لېږدول شوي.

نوموړي دا هم ویلي،چې د داعش ډلې په بریدونو کې شاوخوا دوه نیم سوه کسان په افغانستان کې وژل شوي او تر زرو زیات نور ټپيان شوي دي.

د روسیې دغه مقام په ورته وخت کې د داعش ډلې د زياتو بریدونو اصلي هدف د طالبانو مشران وو.

د روسیې ياد شوي مقام د داعش ډلې د فعالیتونو پر وړاندې د خپل هېواد د ممکنه اقداماتو په اړه څه نه دي ويلي.

د روسیې د بهرنیو چارو وزارت ویاندې ماریا زاخارووا څه موده وړاندې وويل،چې هېواد يې په کابل کې پر خپل سفارت په شوي برید کې له داعش ډلې سره د ځینو هېوادونو د استخباراتي ادارو همکاري نه شي ردولی.

د طالبانو چارواکو د روسيې د دغه مقام څرګندونو ته غبرګون نه دی ښودلی.