تاند:( شنبه،د سنبلې شپږ ويشتمه) د روغتيا نړيوال سازمان وايي،چې سږکال ېې تر ۹میلیونو پورې افغان ماشومان د پولیو ناروغۍ پر ضد واکسین کړي دي.
سرچينه زياتوي،چې دومره ماشومان د تېر کال له نومبر میاشتې څخه تر اوسه پورې واکسين شوي.
د نړيوال روغتيايي سازمان د معلوماتو له مخې، دغو ماشومانو ته ۸۶،۷ میلیونه دوزه واکسين ورکړل شوی.
دغه سازمان خبرداری ورکړی،چې په افغانستان کې حاکم بشري او اقتصادي ناورين او په لیرې پرتو سیمو کې روغتيايي مرکزونو ته د خلکو لږ لاسرسی به د پولیو پر وړاندې مبارزه له ستونزو سره مخامخ کړي.
د نړیوال روغتیايي سازمان له لوري یاد شوي ارقام په داسې حال کې خپریږي،چې د افغانستان د بیارغونې لپاره د امریکا د مرستو د څار ادارې سیګار په یوه راپور کې میلیونونه افغان ماشومانو ته د پوليو پر ضد د واکسين د نه ترسره کیدو خبر ورکړل شوی او له دې کبله د پولیو پېښو د زیاتېدو وېره ښودل شوې.
د طالبانو حاکمې ادارې په دې اړه څه نه دي ويلي.
طالبان پر افغانستان له بیا واکمنيدو مخکې د پولیو پرضد د کمپاین په ننګولو تورنیدل،خو له واکمنيدو وروسته ېې خپل تر اغېز لاندې ملایان، چې پخوا ېې د واکسين خلاف خبرې کولې، د اړوندو کمپاینونو همکارۍ ته هڅولي.