تاند:( پنجشنبه،د سنبلې څلور ويشتمه) په داسې حال کې چې، په افغانستان کې د طالبانو حاکمې ادارې او يو شمېر سياسي څېرو د سويس يوه بانک ته د امریکا له لوري د افغانستان د کنګل شوې بانکي زېرمې د درېیمې برخې د لېږد مخالف دي،د دغې شتمنۍ د ليږد او استفادې له چارو د څارنې د بورډ يوه افغان غړي ډاکټر انور الحق احدي د یادې هڅې په اړه توضیحات ورکړي او دفاع ېې ورڅخه کړې ده.
ښاغلی احدي،چې په پرزول شوي جمهوري نظام کې د افغانستان بانک لوی رییس او دغه راز د ماليې او سوداګرۍ وزير پاتې شوی،په يوه ټلويزيوني مرکه کې وويل،چې د سویس بانک ته له ليږدول کیدو سره به د افغانستان د کنګل شوې بانکي زېرمې دغه برخه خوندي کړل شي.
د نوموړي په وينا، سويسي بانک ته د کنګل شوې افغان بانکي زېرمې د درې نیم میلیارده ډالرو له لېږد سره به پر دغې شتمنۍ څوک دعوه ونه کړای شي،بلکې خوندي به وي.
د ډاکټر احدي اشاره ممکن د امریکا د سپټمبر د يوولسمې پېښې قربانيانو د کورنيو هغې دعوې ته وي،چې له امریکا سره د افغانستان د کنګل شوې بانکي زېرمې نه ېې د يادې پېښې د قربانیانو لپاره د تاوان غوښتنه لرله او ادعا یې لرله،چې القاعدې شبکې ياده پېښه له افغانستان څخه تنظيم کړې وه.
انور الحق احدي زياتوي،چې په سويسي بانک کې د دغې افغان بانکي زېرمې له ايښودو سره به د زېرمې د نظارت بورډ د افغانستان په استازيتوب له اړوندو نړيوالو بانکي بنسټونو سره اړیکې ژوندۍ وساتي، د طالبانو ادارې سره د نړیوال تعامل د خلا له کبله به په نړیوالو بانکي بنسټونو کې د افغانستان حق العضويت ورکړي او هم به د اړتيا پر مهال د افغاني بانکنوټونو د ثبات ساتلو لپاره ممکنه ګامونو سره مرسته وکړي.
نوموړي پرته له دې،چې له یادو پيسو څخه د بشري مرستو لپاره د استفادې يا نه استفادې په تړاو څه ووايي، زياته کړې چې د افغانستان دغه درې نیم میلیارده ډالره به د سویس په بانکونو کې د دوران حالت ولري، ګټه به کوي او کیدونکې لګښتونه به ېې بیرته له تر لاسه کیونکې ګټې تامين شي.
د احدي په وینا، د امریکا حکومت د يادو پيسو د څارنې لپاره څلور کسیزه بورډ جوړ کړی،چې د افغانستان بانک د عالي شورا پخوانی غړی ډاکټر شاد محمد مهرابي، خپله ډاکټر احدي، په سویس کې د امریکا متحده ایالاتو سفیر او د سویس د بهرنيو چارو وزارت استازی پکې غړيتوب لري.
معلومه نه ده،چې د سويس بانک ته د یادو پیسو لېږد به د طالبانو د حاکمې ادارې له مخالفت سره څه برخليک ولري.
مخکې یو شمېر افغان سياسي څېرو د سويس بانک ته د یادو پیسو د لېږد مخالفت له دې کبله کاوه،چې ګواکې په افغانستان کې د بشري مرستو په نوم به مصرف او ضايع به شي.