تاند( شنبه ، د سنبلې پينځمه) په ملګرو ملتونو کې د افغانستان د سفارت سرپرست نصير احمد فایق وايي،چې د امریکا د نیویارک ښار يوې محکمې د ۲۰۰۱په سپټمبر کې د دغه هېواد د تروريستي پېښې قرباني کورنيو ته د غرامت په توګه د کنګل شوې افغان بانکي زېرمې د يوې برخې سپارل رد کړي.
نوموړي په دې اړه نور جزییات نه دي ورکړي.
يادو قربانيانو ته د افغانستان د شاوخوا لس میلیارده کنګل شوې بانکي زېرمې د درېیمې برخې د ورکړې غوښتنه څه موده مخکې د امريکا ولسمشر جوبایډن کړې وه،چې د افغانستان د حاکمې طالب ادارې په ګډون د مختلفو لوړيو توندو غبرګونونو سره مخامخ شو.
يو شمير نړيوالو لوريو هم د دې پروګرام سخت مخالفت کړی او د افغانانو په حق کې ستر ظلم يې ګڼلی و.
امريکايي چارواکو په دې اړه تازه څه نه دي ويلي.