تاند(پنجشنبه، د اسد ۳ مه) پاکستاني رسنۍ وايي چې په کابل کې د منصور احمد خان د ماموریت له پای ته رسېدو وروسته په پام کې ده چې عبیدالرحمان نظامي په کابل کې د پاکستان نوی سفیر ونومول شي.
منصور احمد خان دوې ورځې وړاندې پر خپله ټویټرپاڼه ولیکل چې د افغانستان ماموریت یې پای ته رسېدلی دی.
ده د بهرنیو چارو سرپرست وزیر امیرخان متقي په شمول له یو شمېر طالب چارواکو سره د خدای پامانۍ کتنې هم کړي دي.
ویل کېږي چې عبیدالرحمان نظامي په خټه بلوڅ دی او تر دې وړاندې یې په امریکا او هند کې د پاکستان په سفارتونو کې د دیپلومات په توګه کار کړی دی.
د پاکستان د بهرنیو چارو وزارت تراوسه پورې په دې اړه څه نه دي ویلي.