تاند( سې شنبه ، د اسد ۲۵ مه) ځايي سرچينې ادعا کوي،چې د طالبانو د امنيتي ځواکونو اوږده کتارونه نن د طالب ضدو وسله والو د ځپلو لپاره پنجشېر ولايت ته رسیدلي.
د بې واکه شوي ولسمشر محمد اشرف غني لومړي مرستيال امرالله صالح هم ياده ادعا تاييد کړې او ویلي،چې پنجشېر ته څلور زره طالب جنګيالي تازه ورغلي.
خپلواکو سرچینو د طالبانو د امنيتي ځواکونو د دومره ګڼ شمېر ورتګ نه دی تاييد کړی.
په ورته وخت کې د پنجشېر د عبدالله خېل درې يوې کورنۍ رسنيو ته ادعا کړې،چې طالبانو ېې ۱۶ کلنه لور وژلې.
ځينو خبري سرچينو د دغې کورنۍ په حواله ویلي،چې وژل شوې نجلۍ چینې ته د تګ پر وخت طالبانو وژلې،خو ځينو نورو رسنیو ویلي چې د نجلۍ کورنۍ د دوی کور ته د طالبانو د ورتلو او پر لور یې له جنسي تیري وروسته د نوموړې د وژلو تور پورې کړی.
د طالبانو وياندويانو او نورو سرچينو په دې اړه څه نه دي ويلي.
د طالبانو وياند ذبيح الله مجاهد تل په پنجشېر او ټول افغانستان کې د دوی خلاف د جنګي ډلو د موجودیت ته ادعاوې رد کړي او په دې اړه راپورونه یې ناسم تبلیغات ګڼلي.
له دې سره،د طالبانو د دفاع وزیر ملا یعقوب مجاهد پرون په افغانستان کې د طالبانو د بيا واکمنيدو د لومړۍ کلیزې په مناسبت غونډې ته د وینا پر مهال د دوی خلاف د جنګیدونکو وسله والو ډلو موجوديت تاييد او د ځپلو خبرداری یې ورکړ.
د پنجشېر د مقاومت ډلې پرون د یوې ویډیو له خپرولو سره ادعا وکړه،چې د طالبانو ۴۰ جنګيالي ېې اسیران کړي،خو د طالبانو وياند دا ادعا رد کړه.