تاند- د بریتانیا حکومت به د هغو کډوالو، چې په جرمونو محکوم شوي دي، د څارلو لپاره ژر له ځېره پېژندونکو ځیرکو ساعتونو کار واخلي.
د ګارډین ورځپاڼې له راپور سره سم، د حکومت د نوي پلان پر اساس په پام کې ده چې دا اقدام د سږ کال له مني څخه پیل شي.
د ګارډین ورځپاڼې د راپور له مخې، هغه بهرنیان چې له دې ډول ځیرکو ساعتونو څخه کار اخیستلو ته مکلف کېږي، باید د ورځې تر ۵ ځلونو پورې په دغو ساعتونو خپل عکس واخلي او په دې توګه به یې د ساعت له مخې د ځای ځایګي څرک لګېږي.
ثبت شوې عکسونه د بریتانیا په کورنیو چارو وزارت کې د موجودو فایلونو له نمونو سره پرتله کېږي. که دولتي سیستمونه د کوم چا هویت تایید نه کړای شو، باید عکس په اتومات ډول نه بلکې په لاس تایید شي.
د بریتانیا د عدلیې وزارت په ویبپاڼه کې د خپرو شویو جزییاتو له مخې، د دې ټکنالوژۍ په اړه حکومت د ټکنالوژۍ له بریتانیايي شرکت له بودي لمیتید سره د ۶ میلیون ډالرو په ارزښت قرارداد لاسلیک کړی دی.
د بریتاینا د کورنیو چارو او عدلیې وزارتونو په فایلونو کې له عکسونو سره د کډوالو نومونه، ملیت او د زوکړې نېټې تر ۶ میاشتو پورې ساتل کېږي.
دا پرېکړه یوازې د هغو بهرنیانو په اړه شوې چې جرمونه یې کړي دي.
د بریتانیا د حکومت له راپور سره سم، کډوال او پناه غوښتونکي په دې ډول نه څارل کېږي.