تاند( جمعه ، د اسد ۱۴ مه) د طالبانو په لاس د افغانستان د پرزول شوي نظام د امنيتي او دفاعي ځواکونو د وژنو او ربړونو په لړ کې له دایکندي ولایت څخه د خپل ماشوم زوی مخکې د يوه امنيتي سرتيري د اعدامېدو خبر ورکړل شوی.
خبري سرچينو ويلي،چې دغه اعدام شوی امنيتي سرتېری محمد زابلی نوميږي او اوړمه شپه د طالبانو زندان کې اعدام شوی.
د ۸ صبح ورځپاڼې د سرچينو د معلوماتو په اساس، یاد شوی سرتېری د افغانستان له سقوط څخه وروسته ايران ته تللی و،خو طالبانو ېې ۱۰کلن زوی بندي کړی او دغه سرتېری یې مجبور کړی و،چې بیرته هېواد ته ستون شي.
خبري سرچينو د نوموړي سرتېري د اوسیدو سیمه د دایکندي ولایت ناوه مېش ولسوالي ښودلې او ويلي،چې سرتېری د طالبانو زندان ته له حاضریدو سره د خپل زوی مخکې اعدام شوی.
د طالبانو سرچينو بیا د نوموړي د مرګ دلیل ځان وژنه ګڼلې ده.
د طالبانو وياندويانو رسما په دې اړه څه نه دي ويلي.
طالبان په ښکاره داسې پېښې نه تاييدوي،خو خبري سرچېنې ټینګار کوي،چې د هېواد په نیږدې ټولو سیمو کې د طالبانو له لوري ورته وژنې دوام لري او سانسور شوې رسنۍ او وېرول شوي خبریالان ېې د خبري پوښښ اجازه او جرئت نه لري.