تاند (شنبه، د اسد ۸ مه) د امریکا د بهرنیو چا رو وزارت وايي، د افغانستان بانک د شتمنیو د ازادولو په اړه له طالبانو سره د خبرو په نتیجه کې د دغو پیسو یوه برخه ازادوي.
د افغانستان لپاره د امریکا د ځانګړي استازي ټام ویست په مشرۍ امریکايي پلاوي د طالبانو د بهرنیو چارو او مالیې له سرپرست وزیرانو سره په تاشکند کې د افغانستان بانک د درې نیم میلیارد ډالرو په اړه خبرې وکړې.
د امریکا د بهرنیو چارو وزارت له خبرپاڼې سره سم، دا اقدام په افغانستان کې د بشري بحران د مخنیوي لپاره شوی او متحد ایالتونه هڅه کوي چې دا بهیر چټک کړي.
له بلې خوا رویټرز خبري اژانس وايي چې لا هم د دواړو خواوو ترمنځ د افغانستان بانک د شتمنیو د ازادولو په تړاو اختلاف شته.
امریکا هڅه کوي چې په افغانستان بانک کې یو وجهي صندوق جوړ کړي او یو بهرنی درېیمګری لوري یې اداره کړي.
ټام ویست او د افغان ښځو لپاره د امریکا د حکومت ځانګړې استازې رینا امیري تېره اوونۍ تاشکند ته لاړل چې په دغه ښار کې د افغانستان په اړه په کنفرانس کې د ګډون ترڅنګ له طالبانو سره د افغانستان بانک د شتمنیو په اړه خبرې وکړي.
د تاشکند غونډې ته د افغانستان لپاره د امریکا ځانګړي استازي ټام ویسټ وویل:«واشنګټن چمتو دی چې د افغانستان د شتمنیو د ازادولو لپاره له طالبانو سره خبرې وکړي.»
خو ده په عین حال کې له نړیوالو موسسو وغوښتل چې له طالبانو سره د خبرو له لارې د دغو پیسو د مصرف په برخه کې د شفافیت په اړه ډاډ ترلاسه کړي.
د تېر کال د اګست په ۱۵ مه د طالبانو له واک ته رسېدو وروسته امریکا د افغانستان بانک شاوخوا نهه نیم میلیارد ډالره شتمني، چې د متحدو ایالتونو په بانکونو او خزانې وزارت کې ساتل کېده، کنګل اعلان کړه.