تاند( دوشنبه ، د اسد ۳ ) د طالبانو مشهور قوماندان پيرآغا نن په غزني ولايت کې د یوې ترافيکي پېښې له کبله مړ شوی.
د طالبانو ویاند ذبیح الله مجاهد د هغه د مړينې او ترافيکي پېښې له تایید سره ويلي، چې پيرآغا له حج څخه تازه ستون شوی و او خپل کور ته روان و.
په دې ترافيکي پېښه کې د نورو کسانو د مرګ ژوبلې او د پېښې د څرنګوالي په اړه څه نه دي ويل شوي.
طالب وياند ويلي، چې پيرآغا د شل کلنې جګړې پر مهال مشهور طالب قوماندان و.
هغه د نوموړي اوسنۍ دنده نه ده ښودلې، خو ځینو سرچینو ویلي، چې پيرآغا د طالبانو د ځانګړو ځواکونو قومندان و.
یوه افغان خبریال عبدالحق عمري په خپله ټویټر پاڼه کې لیکلي، چې پیر آغا د کندهار د پخواني امنيه قومندان جنرال عبدالرازق په موټر کې روان و، چې ترافیکي پېښې سره مخ شوی.
د ملي امنیت پخواني رييس رحمت الله نبیل، چې جنرال رازق سره ېې نیږدې اړیکې لرلې، د نوموړي دغه ټویټ لایک کړی دی.
په وروستيو کې د افغانستان په مختلفو سيمو کې د ترافيکي پېښو له کبله د مرګ ژوبلې خبرونه ورکړل شوي، چې د طالبانو مرګ ژوبله هم پکې شامله ده.