تاند( يکشنبه ، د اسد دويمه ) په افغانستان کې د ملګرو ملتونو د سرمنشي د ځانګړي استازي دفتر (يوناما) چارواکو خوست ته د سفر پر مهال د طالبانو د لوی پکتیا د ډلې ( حقاني شبکې) مشر او د دوی د کورنیو چارو وزیر مولوي سراج الدين حقاني سره لیدلي.
نوموړي د دغې لیدنې پر مهال د پکتیکا د وروستیو زلزلو زیانمنو ته د مرستو رسولو په اړه طالب چارواکو سره بحثونه کړي دي.
يوناما وايي په دې لیدنه کې دواړو لوريو د بشري مرستو د چټکولو او نورو موضوعاتو په اړه د بحث تر څنګ د دوی چارواکو ويلي، چې د وروستیو زلزلو د لاملونو د مسلکي ارزونې لپاره به پکتیکا ته د کارپوهانو یوه ډله استوي.
دا په داسې حال کې ده، چې باختر اژانس پرون په پکتيکا کې د زلزلو د پیل شوې لړۍ د ۴۱ م ټکان د محسوسیدو خبر ورکړی.
په پکتیکا کې سختو زلزلو شاوخوا یوه میاشت مخکې تر یو نیم زړو پورې کسان مړه، زرګونه نور ټپيان او لسګونه زره تنه سخت زيانمن کړل.