تاند( جمعه ، د سرطان ۳۱ ) د افغانستان پخوانی ولسمشر حامد کرزی له مشخصې اشارې پرته د افغانستان د نجونو له شپږم څخه د پورته ټولګيو تړل کیدل د پرديو له شومو اهدافو څخه ګڼلي دي.
د هغه د دفتر په یوه مطبوعاتي اعلامیه کې په کنړ کې د دیني علماوو، مشرانو او مخورو د هغې غوڼډې کلک ملاتړ او هرکلی شوی، چې پکې له شپږم ټولگي څخه پورته د نجونو د ښوونځیو د بیرته پرانیستلو غوښتنه شوې.
اعلامیه زیاتوي:« پخوانی ولسمشر د هیواد ترقي او آبادي د نجونو او هلکانو په تعلیم پورې تړلې بولي او له اسلامی سرپرست حکومت نه غواړي چې پدې اړه د هېواد د علماوو او مشرانو ږغ ته احترام وکړي او د نجونو ښوونځي بیرته پرانیزي څو په دې توگه د پردیو شوم اهداف ناکام او خپل خلک او هېواد د روښانه راتلونکې خاوندان کړو.»
حامد کرزي مخکې په دې برخه کې پاکستان ته کنايوي اشارې کولې.
نوموړي د پاکستان د پخواني صدراعظم عمران خان هغو خبرو ته هم توند غبرګون ښودلی و، چې په افغانستان کې د نجونو د ښوونځيو له تړل کيدو ېې ضمني دفاع کړې او ویلي وو، چې د نجونو ښوونځيو ته نه استول د افغانانو يو فرهنګي خاصيت دی.