تاند( چار شنبه ، د سرطان ۲۹ ) په جوزجان کې د طالبانو ځايي چارواکو ويلي، چې په دې ولايت کې ۷ زره تنه په کولرا ناروغۍ اخته شوي دي.
د جوزجان د عامې روغتيا رييس ډاکټر خالص قادري وويل، چې د يادو ناروغانو له ډلې شاوخوا دوه نیم زره تنه د جدي مراقبت په حالت کې دي.
په وروستيو کې د افغانستان له مختلفو ولايتونو څخه د شدیدې نس ناستې یا کولرا ډوله ناروغۍ له امله د لسګونه تنو د مړينې خبر ورکړل شوی دی.
د دغې ناروغۍ د درملنې لپاره د لازمو روغتيايي اسانتياوو نشتوالی د پراخو تلفاتو اصلي دليل ګڼل کېږي.
پر افغانستان د طالبانو له بيا واکمنيدل او د نړیوالو له لوري ېې نه په رسميت پيژندل سبب شوي، چې په روغتيايي برخه کې هم له افغانستان سره د نړيوالو مرستې خورا کمې شي.
الله پاک دې خپل رحم وکړي. (آمین)