تاند( چار شنبه ، د سرطان ۲۲ ) په نیمروز کې ځايي سرچينو ويلي، چې دوو بنو په دغه ولايت کې په ګډه خپل مېړه وژلی.
سرچېنې وايي، چې وژل شوی کس اسدالله نومیږي او د نیمروز د مرکز زرنج ښار اوسنی او د کندوز اصلي اوسیدونکی و.
ويل شوي، چې دغه کس درېيمه مېرمنه هم لرله او دغه پېښه د نوموړې له کبله رامنځته شوې ده.
خبري رسنۍ وایي، دغه پېښه د وژل شوي سړي د دوو لومړيو مېرمنو د وروڼو په مرسته شوې، چې ځینې کسان ېې په تور نیول شوي هم دي.
د طالبانو ځايي چارواکو په دې اړه څه نه دي ويلي.
د طالبانو له واکمنيدو او د اقتصادي او بشري ناورين له شدت سره په افغانستان کې کورنی تاوتریخوالی زیات شوی او د ډېرو داسې وژنو خبرونه ورکول کېږي.