تاند( یکشنبه ، د سرطان دولسمه ) په ترکیه کې د طالبانو د واکمنۍ پر ضد جوړې شوې ( د افغانستان د ژغورنې لپاره د ملي مقاومت عالي شورا) په کابل کې د طالبانو په ملاتړ د ملایانو د غونډې پریکړه لیک ته غبرګون وښود.
دغې شورا په یوه اعلامیه کې ویلي، چې طالبانو واک غصب کړی او واکمني ېې مشروعيت نه لري ، خو د نمایشي غونډې او د ملایانو له نا مسوولانه فتوا سره د خپلې واکمنۍ د مشروعيت موندلو هڅې کوي.
د دغې شورا په اعلامیه کې د طالبانو د ادعا شوي لوی مشر ملا هبت الله اخندزاده د وينا په تفسير له مخې ويلي ، چې نوموړي د جعفري فقې د لغوه کیدو خبره کړې ده.
سرچینې د غیر طالب سیاستوالو په اړه د ادعا شوي ملا هبت الله منفي څرګندونو ته په اشارې ویلي ، چې د طالبانو په اړه متمایلو سياسي څېرو ته به ثابته شوې وي ، چې طالبان له خپلې ډلې د باندې چا ته په درنه سترګه نه ګوري او دوی ټول باید د طالبانو پر وړاندې د مقاومت بهیر پیاوړی کړي.
د مقاومت شورا ، چې اعلامیه ېې د جنبش ګوند د مشر عبدالرشيد دوستم او یو شمېر نورو سياستوالو له لوري خپره شوې ، له ټولو دیني عالمانو غوښتي چې د طالبانو د پلویانو ملایانو د فتوا په اړه، چې د طالبانو پر وړاندې مبارزه ېې بغاوت او ناروا ګڼلې ده، خپل شرعي مکلفيت ادا او خپل دريځونه څرګند کړي.
د طالبانو په پلوۍ دغه غونډه پرون پای ته ورسېده ، چې له يو شمېر نورو منفي غبرګونونو سره هم مخامخ شوې ده.