تاند( دوشنبه ، د سرطان شپږمه ) د طالبانو د سرپرست حکومت وياند ذبيح الله مجاهد د سرپل ولايت په بلخاب ولسوالۍ کې د دوی د یوه ياغي شوي هزاره قومندان مولوي مهدي د ځپلو لپاره په تر سره شویو عملیاتو کې د ولسي تلفاتو ادعاوې رد کړې.
مجاهد په یوه ټویټ کې لیکلي: « د سرپل بلخاب کې هیڅ ملکي تلفات او زیان نلرو.»
هغه زیاتوي ، چې په دې اړه دملګروملتونو د بښنې سازمان راپور بې اساسه دی.
طالب ویاند زیاتوي: « نه پوهیږو دغه سازمان دکوم سند په اساس داسې ادعا کوي؟!! په داسې حال کې چې له سیمې څخه هیڅ کوم دقیق معلومات نلري.دا ډول بې بنیاده ادعاوې د یادو نړیوالو سازمانونو حیثیت ته زیان رسوي.»
د بښنې نړېوال سازمان نن وویل: « موږ په بلخاب ولسوالۍ کې د وسله والو د مقاومت په غچ کې د طالبانو لخوا د ملکي وګړو د وژلو په اړه د اندېښنې وړ معلومات ترلاسه کړي.»
ياد شوی سازمان زیاتوي:« موږ انديښمن یو چې طالبان باید ډله اییز سزا ورکول او د نورو جنګي جرمونو ترسره کول ودروي او نړیوال بشرپاله قانون ته درناوی وکړي.»
د سرپل لپاره د طالبانو والي محمد یعقوب عبدالرحمن اکه نن ویلي، چې په بلخاب ولسوالۍ کې یې « باغیان» ځپلي دي.
نوموړي پرته له دې ، چې د طالبانو پخوانی مشهور هزاره قومندان مولوي مهدي او د هغه وسله وال کسان ياد کړي ، ويلي چې دغه کسان په ياده ولسوالۍ کې د خلکو د ځورونې سبب ګرځيدل.
د سرپل لپاره د طالبانو والي ویلي، چې نن ېې بلخاب ولسوالۍ ته سفر کړی او هلته بشپړ امنيت تامين دی.
د طالب والي دا څرګندونې په داسې حال کې دي ، چې د راپورونو له مخې طالبانو په بلخاب کې خپل ناراض قوماندان مولوي مهدي او د هغه وسله وال ځپلي او سيمه یې ترې په خپله ولکه کې نيولې ده.
ځايي خلکو شکایت کړی ، چې طالبانو هلته ملکي خلک کډوالۍ ته مجبوره کړي، وژلي او ملا مهدي سره د تړاو په تور بنديان کړي.
د طالبانو د رييس الوزرا اداري مرستيال مولوي عبدالسلام حنفي بيا په دې اړه د شیعه علماوو شورا غړو سره د لیدنې پر مهال دا تورونه رد کړي دي.
مولوي مهدي د طالبانو د بیرته واکمنيدو په لومړیو څو مياشتو کې د بامیان ولایت لپاره د طالبانو د استخباراتو رییس و ، چې له دندې تر ګوښه کیدو وروسته خپلې پلرنۍ سیمې بلخاب ته لاړ او د ولسوالۍ له نیولو سره ېې له طالبانو څخه بغاوت وکړ.
طالبانو د نوموړي د پخلاينې لپاره څو پلاوي واستول او د ښار جوړونې وزارت د مرستیالۍ لپاره ېې کابل ته وباله ، خو مولوي مهدي ونه منله.