تاند( دوشنبه ، د سرطان شپږمه ) د سره صليب نړيوالې ادارې د افغانستان د وروستيو زلزلو د زيانونو په اړه د خپلو ارزونو پایلې په ډاګه کړې.
دغې ادارې ويلي ، چې وروستیو زلزلو د افغانستان په سویل ختیزو سيمو کې شاوخوا ۲ زره کورونه ړنګ کړي، چې ۶۰ زره کسان ورسره په مستقيمه او ۲۰۰ زره کسان په نا مستقيمه توګه زيانمن شوي دي.
د سرچينې د معلوماتو له مخې ، د زيانمنو شويو کسانو ۴۰ سلنه ېې ماشومان دي.
نړيوال سره صليب له ځپل شویو او ټولو افغانانو سره د بېړنيو مرستو غږ کړی او ویلي ، چې د افغانستان څه باندې ۵۰ سلنه خلک د جګړې، وچکالۍ، اقلیمي شرایطو او اقتصادي ناورين له کبله سخت ځپل شوي دي.
سره صليب دغه راز زياتوي ، چې په افغانستان کې شاوخوا ۲۰ ميليونه خلک د خوړو له پلوه نا امنه دي ، یانې هغسې صحي او لازم خواړه چې باید ولري ، نه ېې لري.
ويل شوي ، چې له پینځو کلونو څخه د کم عمره ماشومانو نېږدې نیمايي برخه ېې له خوارځواکۍ د څخه ځوريږي.
د طالبانو تر کنټرول لاندې باختر خبري اژانس نن د وروستۍ زلزلې د مرګ ژوبلې په اړه په دې ډول وروستي ارقام خپاره کړي دي:« په پکتيکا او خوست ولايتونو کې له مرګانۍ زلزلې وروسته چې له امله يې څه ناڅه ١٢٠٠ تنه ووژل شول او څه د پاسه دوه زره تنه نور ټپيان شول.»