تاند( جمعه ، د سرطان درېیمه) راپورونه وايي، چې د پکتیکا په ګیانې ولسوالۍ کې نن سهار لس بجې د زلزلې ټکانونه احساس شوي دي.
د لومړنيو راپورونو له مخې، د نننۍ زلزلې له امله لږترلږه ۵ تنه مړه شوي او څه باندې ۱۰ تنه نور ژوبل دي.
د طالبانو تر کنټرول لاندې باختر خبري اژانس د دې زلزلې خبر تایید کړی دی.
باختر اژانس د تلفاتو د زیاتیدو احتمال هم څرګند کړی.
د امریکا د جیالوجیکي سروې ادارې د نننۍ زلزلې شدت د ریښتر په حساب ۴ اعشاریه ۳ اټکل کړی دی.
په پکتیکا کې د څو شپې مخکې زلزلې له امله نيږدې زر تنه مړه شوي او شاوخوا يو نيم زر تنه نور ټپيان دي.
د طالبانو د لوړ پوړو چارواکو په ګډون د يو شمېر ګاونډيو او اسلامي هېوادونو عاجلې مرستې دغه ولايت ته رسیدلي.
د دې ترڅنګ د افغانستان په ډېرو ولايتونو کې له زلزله ځپلو سره د مرستې لپاره د اقتصادي ناورين باوجود د مرستې ټولولو ولسي کمپاينونه پیل شوي دي.