تاند( سې شنبه ، د جوزا ۳۱ مه) د طالبانو د حکومت ویاند ذبیح الله مجاهد وايي، چې لوی مشر ېې مولوي هبة الله اخندزاده د افغانستان د سوداګرۍ او پانګونې خونې، د صنایعو او کانونو ګډ پلاوي، د هېواد په کچه له سوداګرو، صنعتکارانو او پانګهوالو سره وکتل.
د هغه په وينا، په دې کتنه کې د طالبانو د اوبو او انرژۍ سرپرست وزیر ملا عبدالطیف منصور، د چارو ادارې لوی رئیس مولوي احمدجان احمدي او د کندهار والي حاجي محمدیوسف وفا هم حاضر وو.
طالب وياند د پانګه والو او صنعت کارانو په حواله وايي، چې له ملا هیبت الله سره ېې د خصوصي سکتور د پياوړتیا او شته ستونزو لیرې کېدو په موخه هر اړخیز بحث او خبري وکړې او ډاډ یې ورکړ، چې په خپله پانګهاچونه او صنعت کې به پراخوالی راولي.
د طالبانو د ویاند په وینا، چې لوی مشر ېې سوداګرو ته ویلي :« زموږ اسلامي امارت تل د سوداګرو، صنعتکارانو او پانګهوالو ملاتړ کړی او راتلونکي کې به هم ورته ځانګړې پاملرنه کېږي.»
د طالبانو د اعلاميې له مخې، مولوي هیبت الله له یاد پلاوي څخه غوښتي، چې د هېواد د اقتصادي خپلواکۍ او پرمختګ په برخه کې رغنده ګامونه واخلي او په هېواد دننه پانګه اچونه زیاته کړي چې خلکو ته کاري زمینه برابره شي او هم د هېواد د بیا رغونې په برخه کې پوره هڅې وکړي.
د طالبانو په اعلامیه کې د ملا هیبت الله د ښکاره کیدو له کوم عکس پرته ادعا شوې، چې هغه ټولو سوداګرو، صنعتکارانو او پانګهوالو ته د اعزاز پګړۍ ډالۍ کړي دي.
د یادونې وړ ده، چې طالبانو د دغې ادعا شوې لیدنې خبر د سوداګرو او پانګوالو له خولې نقل کړی او په دې اړه دقیق جزییات لا نه دي په ډاګه شوي.
۱- مجاید همیشه دروغ ویلی او دروغ وائی اونور دروغ به هم ووائی.
۲- که احیاناً دروغ ئې نه وی ویلی نو دا میلمانه او د های باټولا په مجلس مشرف سوی کسان اخلاقی- ملی مکلفیت لری چی د میډیا له لیاری وولس ته پدې هکله معلومات وړاندی کړی.
۳- نن سبا د بګړۍ مګړۍ عزت او کرامت او برکت او حرمت تر پښو لاندی سویدئ نو هیبټولا دی دا بګریانی تر کُناټی لاندی کښېږدی او خلګ دی نه په غولوی.