داودجبارخیل
د پنجاب اعلا وزیر حمزه شهباز د انرژۍ سپمولو لپاره د شپې تر نهو بجو د سوداګریز ومرکزونو او دوکانونو د بندولو اعلان کړی دی.
د پنجاب د وزیر اعلی له دفتره په خپره شوې خبرپاڼه کې ویل شوي چې د سې شنبې په ورځ د سوداګرو له پلاوي سره تر لیدنې وروسته په هېواد کې د انرژۍ د روان بحران له امله د شپې تر ناوخته د سوداګریزو مرکزونو د تړلو پرېکړه شوې ده.
په پنجاب کې د برېښنا د سپمولو د پلان تطبیق به د دوشنبې په ورځ د جون په ۲۰ پیل شي. د پیرودلو او سوداګرۍ مرکزونه، هټۍ او رستورانتونه به د شپې په پیل کې وتړل شي.
د اعلان له مخې، د ودونو تالارونه به د شپې په 10 بجو او رستورانتونه به د شپې په 11:30 بجو تړل کیږي. درملتونونه به استثنا وي.
په لومړي پړاو کې به دا پرېکړه د لاهور په ګډون د صوبې په ټولو لویو ښارونو کې عملي کېږي.
ياده دې وي چې په سندهـ صوبه کې د انرژۍ د بحران د حل لپاره په ښارونو کې د بازارونو او کاروباري مرکزونو د شپې په نهو بجو او د ودونو هالونو د شپې په ۱۰:۳۰ بجو د تړلو پرېکړه لا دمخه عملي شوې ده.
د پاکستان د صدراعظم شهباز شريف په مشرۍ د هیواد د اقتصادي شورا په غونډه کې څلورو واړو صوبو په اصولي توګه موافقه وکړه چې د انرژۍ له بحران سره د مقابلې لپاره به د شپې اته بجې بازارونه او دوکانونه بندوي.