تاند( شنبه، د جوزا ۲۸ مه) د کابل لپاره د طالبانو والي صاحب شیخ الحدیث مولوي نداء محمد نديم نن د کابل ښار په کارته پروان سيمه کې د اهل هنودو له هغه عبادت ځای څخه لیدنه وکړه، چې څو ساعته د څو بریدګرو تر برید لاندې و.
د نوموړي وياند هاشمي په خپره کړې اعلامیه کې پرته له دې، په دې په مشخص ډول د چا نوم واخلي، د « دښمن» په ټکي له ټینګار سره د پېښې عاملين په خپل هدف کې پاتې ګڼلي او په ځپلو ېې ټینګار کړی.
په اعلامیه کې د نننۍ پېښې د غندنې او اهل هنودو سره د غمرازۍ کومه يادونه نه ده شوې، تر دې چې عبادت ځای ته ېې يوازې « د خلکو د ګڼې ګوڼې ځای» اصطلاح کارول شوې ده.
په دې اړه د کابل لپاره د طالبانو د والي له خولې ليکل شوي:« دښمن نور له پښو غورځیدلی، همدا يې اخيري زور دی، د مخامخ مقابلې زور يې له لاسه ورکړی، غواړي اسلامي مقدسات، مکتبونه او هغه ځايونه چې د خلکو ګڼه ګوڼه پکښې زياته وي په نښه کړي، همدا ددوی وروستي هدفونه دي او تاسو ته اطمينان درکوم چې دښمن به له منځه ځي او هغوی نور د مقاومت توان له لاسه ورکړی.»
د طالبانو د کابل د والي دا څرګندونې په داسې حال کې دي، چې د نړۍ ډېرو هېوادونو، افغان سیاستوالو او په پراخه کچه افغانانو یاده پېښه غندلې او له افغان هندوانو او سکهانو سره ېې خواخوږي څرګنده کړې ده.