تاند( جمعه، د جوزا ۲۷ مه) د کندوز له امام صاحب ولسوالۍ څخه پر یوه جومات د چاودنې لومړني راپورونه څرګندوي، چې په دې چاودنه کې ۱۲ تنه وژل شوي او ۳۰ نور ټپيان دي.
ویل شوي، چې ياده چاودنه د امام صاحب ولسوالۍ د الفببیردي قریې په یوه جومات کې شوې ده.
ولسي سرچينو په چاودنه کې د وژل شويو کسانو شمېر ۱۲ او د ټپیانو شمېر ۳۰ تنه ښودلی.
د طالبانو ځايي چارواکو په جومات کې دغه چاودنه تاييد کړې، خو د زيانونو په اړه يې څه نه دي ويلي.
دا له څه مودې ځنډ څخه وروسته د جمعې ورځې د لمانځه پر مراسمو ورته برید دی.
د طالبانو له بیا واکمنيدو سره د افغانستان په مختلفو سيمو کې د جمعې ورځې د لمانځه پر مراسمو چاودنې او بریدونه شوي، چې لسګونه کسانو ته پکې مرګ ژوبله اوښتې ده.
د ډېرو مخکینیو بریدونو مسوولیت داعش ډلې پر غاړه اخیستی دی.