تاند( پنج شنبه، د جوزا ۲۶ مه) د طالبانو د حکومت ویاند او د اطلاعاتو او فرهنګ وزارت د خپرونو چارو معین ذبیح الله مجاهد هغه ادعاوې رد کړې چې ګواکې په افغانستان کې د بشر حقوق ضایع کېږي.
نوموړي نن ویلي چې که د تېر کال دغه شپې له روان کال سره پرتله شي، نو جوته به شي چې د بشر حقونه هغه وخت ضایع کېدل، پر کورونو بمونو غورځول کېدل؛ خو سږ کال د خلکو امنیت تامین دی.
د ذبیح الله مجاهد په خبره، په اقتصادي برخه کې هم هڅې پیل شوي چې د خلکو ژوند ښه شي.
مجاهد وايي، چې په افغانستان کې د بد اقتصادي وضعیت مسؤلیت ملګرو ملتونو ته ورګرځي؛ ځکه چې امریکا د افغانستان شتمني ګنګل کړې.
د طالب ویاند د څرګندونو له مخې؛ په هېواد کې شل کلنې جګړې هم د خلکو پر اقتصاد منفي اغېز کړی، هغه پر نړېواله ټولنه غږ کړی چې د ګیلو او نیوکو پر ځای د افغانانو لاسنیوی وکړي.
مجاهد دا څرګندونې په داسې حال کې کوي، چې له شل کلن جمهوري نظام څخه مخکې يې د خپلې واکمنۍ د اقتصادي وضعیت کوم ارقام نه دي وړاندې کړي.
د طالبانو منتقدین بيا تېر ۲۰ کلن جمهوري نظام په اقتصادي لحاظ افغانستان ته تاریخي فرصت بولي او د پیسو د ناسم مصرف او فساد له کبله نیوکې لري.