تاند- د نړۍ تر ټولو سترستره الوتکه، چې (Roc) نومېږي، د جون په نهمه د کلیفورنیا ایالت له مجاوې دښتې (Mojave Desert) والوته او تر ټاکلي وخت ژر بېرته پر مځکه کښېناسته.

دا د دې الوتکې، چې دوه باډۍ لري، شپږم تجربوي الوت و.

د دې الوتکې جوړوونکې کمپنۍ ستراتولنچ (Stratolaunch) وویل، دوی په دې تجربوي الوت کې خپل ځینې ټاکلي هدفونه ترلاسه کړل.

ټاکل شوې وه چې دا الوتکه درې نیم ساعته په هوا کې وي خو خپل پروګرام یې ۹۰ دقیقو ته رالنډ کړ.

د ستراتولانچ کمپنۍ ویندوی پر خپله ټویټرپاڼه کښلي:«موږ پرېکړه وکړه چې الوتکه کښېني څو معلومات (ډاتا) وڅېړو او بل الوت ته چمتو شوو.»

دا الوت د الوتکې په منځني وزر کې د یوه نوي نصب شوي انتن د ازمویلو لپاره و. خو پېلوټان مجبوره شول چې د تجربې د نتیجو د څېړلو لپاره تر ټاکلي وخت ژر کښېني.

تراوسه پورې د نتیجې په اړه څه نه دي ویل شوي.

(Roc) الوتکه، چې ۱۱۷ متره اوږده ده، په تجربوي الوت کې ۴ زره ۵۷۲ متره لوړه شوه.