تاند( پنج شنبه، د جوزا ۲۶ مه) د طالبانو د لوړو زده کړو سرپرست وزیر مولوي عبدالباقي حقاني د یو پلاوي په مشرۍ د هېواد د لوړو زده کړو لپاره د مرستو راجلبولو په موخه، پرون ماښام د ترکیې په رسمي بلنه دغه هېواد ته سفر وکړ.
د طالبانو په یوه اعلامیه کې په دې اړه راغلي:« په پام کې ده چې د لوړو زده کړو سرپرست وزیر به په دغه سفر کې د افغانستان د تحصیلي نظام د ځواکمنتیا د تحصیلي بورسونو زیاتولو، د دواړو هېوادونو د پوهنتونونو تر منځ د اکاډمیکو همکاریو او ګډو څېړنیزو پروژو په برخه کې د یاد هېواد د مرستو راجلبولو په موخه د دغه هېواد له یو شمېر چارواکو سره وګوري.»
د طالبانو د لوړو زده کړو وزير په داسې حال کې ترکېې ته په سفر تللی، چې دغه هېواد هم پر نجونو او ښځينه وو د طالبانو د تعليمي قيوداتو له منتقدینو څخه دی.
د ترکیې د بهرنیو چارو وزیر داوود چاوش اوغلو د طالبانو د واکمنۍ په لومړيو وختونو کې پر نجونو د دوی د سخت دریځو تعليمي قيوداتو په غبرګون کې غوښتل چې د يو شمېر اسلامي هېوادونو د بهرنیو چارو وزیرانو په ملتيا کابل ته راشي او طالبانو ته له ضد بازۍ څخه يې د لاس اخيستو خبرې وکړي.
ويل کيږي، چې همدغه سفر سره د طالبانو نه لېوالتيا له دوی څخه د ترکېې د هیلو کميدو سبب شوه او څنګه چې دواړو لوريو تمه لرله، په هغه ډول يې اړيکو وده ونه کړه.