تاند( دوشنبه، د جوزا ۲۳ مه) د ننګرهار امنیه قوماندانی لپاره د طالبانو چارواکو د اختطاف په تور د ۳ تنو د نیولو خبر ورکړ.
د ننګرهار د امنیې قوماندانۍ لپاره د طالبانو ویاند بصیر زابلي ویلي چې، دغه کسان يې ځواکونو د یکشنبې په ورځ د ۳ تنو د تښتونې په وخت نیولي.
نوموړي نيول شوي کسان د بټي کوټ او خوګیاڼو ولسوالۍ اوسېدونکي ياد کړي.
د زابلي په خبره، نیول شوي کسان د تېښتې په حال کې وو چې د مومندرې او بټي کوټ ولسوالۍ د امنیتي ځواکونو له خوا ونیول شول او اوس د یاد ولایت په امنیې قوماندانۍ کې تر څېړنو لاندې دي.
د امنیې قوماندانۍ د معلوماتو له مخې، نیول شویو کسانو په خپل جرم اعتراف کړی او د دوی تر څېړنو وروسته به عدلي او قضایي ارګانونو ته ور وپېژندل شي.
په وروستيو کې د افغانستان له ډېرو سيمو څخه د انسان تښتونې د پېښو خبرونه ورکول کېږي.
له دې سره، طالب چارواکي د تښتونکو پر وړاندې د خپلو اقداماتو او ډېرو لاسته راوړنو خبره کوي.