تاند( دوشنبه، د جوزا ۲۳ مه) د طالبانو چارواکي وايي، چې ارتباط کميسيون په هڅو ېې د تير نظام د کورنيو چارو وزارت د ملي پوليسو د کوپراتیف پخوانی رييس تورن جنرال محمد انور کوهستانی هېواد ته راستون شو.
د طالبانو د ياد شوي کمېسيون وياند احمدالله وثیق ويلي، چې نوموړي پرون د تماس کميسيون د ارتباط څانګې له مسول انس حقاني سره وليدل او د طالبانو له لوري يې د نوموړي د تود هرکلي ستاینه وکړه.
د جمهوري نظام پر مهال د کورنيو چارو وزارت سلاکار ادریس ستانکزي بيا د طالبانو د دغه ټویټ له شریکولو سره لیکلي:« د کورنیو چارو وزارت دغه جنرال یو لوی غل و، هغه د جمهوريت پر مهال د سل میلیونه افغانیو د اختلاس له کبله د درنو جرمونو پر وړاندې د مبارزې ریاست نیولی و. غله او خاینان په هره دوره کې قدردان وي؋.
طالبانو او خپله دغه جنرال په دې اړه څه نه دي ويلي.
په وروستيو کې نیږدې هره ورځ طالبان، له هېواد څخه د يوه مخکيني چارواکي د بیرته ستنیدو خبر ورکوي.
د دغې لړۍ منتقدین وايي، چې را ستنېدونکي کسان تر ډېره د خپلو شتمنيو او ملکیتونو د خونديتوب لپاره را ګرځي.