په کندز کې د پردېس کلتوري او ادبي ټولنې او هېواد ښوونیز مرکز لخوا د معاصر افغانستان بنسټګر لوی امپراتور غښتلي، ویاړلي، متدین او مقتدر واکمن احمد شاه بابا ۲۵۰م تلین په پار یاد غونډه ترسره شوه.
یاده غونډه کې د پردېس کلتوري او ادبي ټولنې رهبري او غړي، د کندز اطلاعاتو او کلتور مشرتابه، د هېواد ښوونیز مرکز د رهبرۍ استازي او ښوونکو، د پوهنتون استادانو شاعرانو، لیکوالانو، خبریالانو او زده کړیالانو ګډون درلود.
د غونډې په پیل کې د پردېس کلتوري او ادبي ټولنې مشر محمد اسلم رشیدي مېلمنو ته د ښه راغلاست ویلو ترڅنګ، د ملي یووالي په برخه کې د ستر امپراتور احمد شاه بابا د کارنامو په هکله معلومات وړاندې کړل.
وروسته پیاوړی ځوان استاد عبدالبصیر وهاج د لوی امپراتور احمد شاه بابا د ژوند، مبارزې او اند په اړه په زړه پورې سیمینار وړاندې کړ.
ورپسې د علي آباد ولسوالۍ د کرکټ مسؤل عصمت الله بنیاد، پیاوړي شاعر او لیکوال غلام حیدر حیدر او د کندز اطلاعاتو کلتور رئیس مطیع الله روحاني د بابا پر ویاړلې تاریخ خبرې وکړې او لوی امپراتور احمد شاه بابا یې د عزت، غیرت او مېړانې یو دنګ څلی یاد کړ.
د غونډې په دویمه برخه کې آزاده مشاعره ترسره شوه چې ځوانو شاعرانو پکې خپل شعرونه ګډونوالو ته واورول او غونډه د دعايې په ویلو سره پایته ورسېده.
د پردېس ټولنې د اړیکو او رسنیو څانګه