افغانستان زیمبابوې ته په ۶ ویکټونو او ۴ توپونو ماتې ورکړه. دا لوبه هغه مهال هیجاني شوه چې د افغانستان د توپونو شمېر شېبه په شېبه د پکار منډو پرتله کمېدل.
د لوبې په وروستیو شېبو کې محمدنبي د نجیب الله ځدراڼ په همکارۍ ځان هدف ته ورساوه. او په داسې حال کې چې ۵ توپونه یې لرل او ۶ منډو ته یې اړتیا وه، نجیب الله ځدراڼ شپږیزه ووهله او د ټولو اندېښنې یې په همدې شپږیزې پای ته ورسولې.
په پیل کې د افغانستان لپاره حضرت الله ځاځي او رحمت الله ګوربز ښه ملګرتیا پیل کړه. ځاځي په ۲۶ توپونو ۴۵ او ګوربز په ۳۶ توپونو ۳۳ منډې وکړې. وروسته نجیب الله ځدراڼ د تل د اکثرو نورو وختونو په شان ښه بیټنګ وکړ. ده په ۲۵ توپونو ۴۴ منډې وکړې او د لوبې غوره لوبغاړی هم وګڼل شو. محمدنبي په ۸ توپونو ۱۵ حساسې منډې جوړې کړې.
زیمبابوې، افغانستان ته ۱۶۰ منډې هدف وټاکه
تاند(شنبه، د جوزا ۲۱ مه) د زیمبابوې د کرکټ ملي لوبډلې افغانستان ته په لومړۍ شل اوره سیالۍ کې ۱۶۰ منډې هدف وټاکه.
دا د افغانستان او زیمبابوې ترمنځ د درو شل اوره سیالیو د لړۍ لومړۍ مسابقه ده. د دې سیالۍ پچه زیمبابوې وګټله او غوره یې وبلله چې لومړی په خپله بیټنګ وکړي.
په دې سیالۍ کې د افغانستان لپاره یوه نوي لوبغاړي نجات مسعود ښه باولینګ یا توپ وهنه وکړه. ده په ۴ اورونو کې د سیالې لوبډلې ۳ لوبغاړي وسوځول.
د زیمبابوې ټولتال ۸ لوبغاړي وسوځېدل. دوه تنه د راشدخان او کریم جنت له لوري رن اوټ شول او ۳ نور راشدخان، فضل حق فاروقي او محمد نبي وسوځول.
د زیمبابوې لپاره تر ټولو ښه بیټنګ سکندر رضا وکړ. ده په ۳۱ توپونو ۴۵ منډې وکړې.