تاند(چار شنبه، د جوزا ۱۸ مه) په داسې حال کې، چې د افغانستان په بازارونو کې د افغاني بانکنوټونو د کمښت شکايت کیږي، راپورونه وايي چې په مختلفو ولايتونو کې د پاکستاني کلدارو بیرته چلښت زيات شوی.
له دې سره په افغانستان بانک کې یوه سرچینه تاند ته وايي، چې په پولینډ کې درې میلیارډه افغانۍ د جمهوري نظام په وروستيو کې چاپ شوي، خو د ښځو پر وړاندې د طالبانو سخت دریځي ېې هېواد ته د لېږد پر وړاندې اساسي خنډ دی.
طالب چارواکو په دې اړه څه نه دي ويلي.
له څه مودې راهيسې مختلفو ولايتونو څخه د افغاني بانک نوټونو د کمښت شکايت کیږي.
اقتصادي شنونکي انديښمن دي، چې د طالبانو نا سنجول شوي کارونه به د افغانستان د اندیښنې وړ اقتصاد او نورو زيربناوو د نابودۍ سبب شي.
دوی له طالبانو غواړي، چې د مسلکي خلکو غږ واوري او د افغانستان برخليک د خپلو ایډیالوژیکو هوسونو قرباني نه کړي.