تاند(چار شنبه، د جوزا ۱۸ مه) د طالبانو د دفاع وزارت چارواکو ويلي، چې ايران ورته د دوی په هڅو د جمهوري نظام د سقوط پر مهال د ور وړل شويو پوځي تجهيزاتو او وسلو يوه اندازه بیرته سپارلې ده.
د طالبانو په اعلامیه کې راغلي، چې په دې تجهيزاتو او وسلو کې ۱۷ فيلډرې او لوکسې موټرې، ۶ عراده رينجرې، ۶ هاموې ټانګونه، يو انټرنيشنل موټر، يو څلور ټایره موټر، يو اطفائيه موټر، ۵۷ کلاشينکوفونه، ۳۹ راکټه، ۴۲ پيکاګانې،۷ دهشکې او یوه اندازه نورې وسلې شاملې دي.
د سرچينې د معلوماتو له مخې، دغه وسلې او تجهيزات د اسلام قلعه بندر له لارې ایراني چارواکو بيرته طالبانو ته سپارلي دي.
ويل شوي، چې دغه وسلې او تجهيزات د جمهوري نظام د پاشل شويو امنيتي ځواکونو له لوري د نظام د سقوط پر مهال ايران ته وړل شوي وو.
د طالبانو ځینو تبلیغاتي مبلغينو په ټولنيزو رسنيو کې د خپل دفاع وزیر مولوي یعقوب مجاهد په حواله لیکي، چې ټولو هېوادونو څخه به د افغانستان وسلې او مهمات په همدې ډول بیرته را وګرځوي.
د طالبانو په رسمي اعلاميه کې په دې اړه څه نه دي ويل شوي.
ويل کيږي، چې پر ایران سربېره پاکستان، ازبکستان، تاجيکستان او یو شمېر نورو ګاونډيو هېوادونو ته هم د جمهوري نظام د سقوط پر مهال په ورته ډول په پراخه کچه د افغانستان وسلې او مهمات قاچاق شوي دي.
مخکې ازبکستان او تاجيکستان، چې د افغانستان ډېرې چورلکې وروړل شوي، د وسلو او تجهيزاتو له سپارلو ډډه کړې وه، چې د طالبانو له توند لفظي غبرګون سره مخ شوي دي.