تاند(پنجشنبه، د جوزا ۱۲ مه) د طالبانو د بهرنيو چارو وزارت وايي، چې د دغه وزارت سرپرست مولوي امیرخان متقي نن د هندوستان د بهرنیو چارو وزارت د جواینټ سکرټري جي پي سنګ او مل پلاوي سره ولیدل.
د سرچينې په وينا، په دې لیدنه کې د افغانستان او هندوستان تر منځ پر دیپلوماتیکو اړیکو، دوه اړخیز تجارت او بشري مرستو خبرې وشوې.
د طالبانو بهرنیو چارو وزیر د هندوستان د بهرنیو چارو وزارت او حکومت په نمایندګۍ راغلي لومړني هیئت ته ښه راغلاست وویل او دا یې د دواړو هیوادونو تر منځ یو ښه پیل وباله.
متقي همداراز د هندوستان د وروستیو بشري او روغتیا برخو کې کومکونو څخه مننه وکړه او ټینګار یې وکړ چېهندوستان په افغانستان کې باید خپلې درول شوي پروژې له سره پيل کړي، خپل دیپلوماتیک شتون فعاله کړي او افغانانو ، په خاص ډول محصلانو او ناروغانو ته قونسلي خدمات وړاندي کړي.
د طالبانو د اعلاميې له مخې، د هندوستان هیئت وویل چې دوی د افغانستان سره« د پخوا په څیر» ښې اړیکې غواړي او خپلو مرستو ته دوام ورکوي.
طالبانو د هندي پلاوي د « پخوا په څېر» اړيکو موضوع نه ده روښانه کړې.
هندوستان د افغانستان د جمهوري نظام له تر ټولو نیږدې ملګرو هېوادونو څخه و.
هند لومړنی هېواد و، چې د افغانستان تېر جمهوري نظام سره ېې د ستراتیژیکو همکاریو سند لاسلیک کړ او له دې نیږدې اړيکو یې پاکستان تل شکايت درلود.