تاند(دوشنبه، د جوزا ۹ مه) د ترکیې د “آیایچایچ” بنسټ د اسيايي څانګې مشر عبدالله په کابل کې د يتيمانو د يوه لوی روزنتون د جوړولو د پلان خبر ورکړی.
نوموړي د طالبانو د پوهنې وزارت سرپرست مولوي نورالله منير سره د ليدنې پر مهال دا خبره کړې ده.
د طالبانو د پوهنې وزارت ويلي، چې د ياد شوي روزنتون ځمکه به دوی برابروي او پکې ساختماني چارې به د ترکيې ياد شوی بنسټ تر سره کړي.
سرچینې په دې اړه له ډېرو جزییاتو پرته ويلي، چې د روزنتون د ودانۍ له جوړېدو سره به د روزنتون ودانۍ د طالبانو پوهنې وزارت ته په واک کې ورکړل شي.
د ترکیې د ياد شوي بنسټ استازي کابل ته د سفر پر مهال له یو شمېر نورو طالب چارواکو سره هم ليدلي او په مختلفو برخو کې ېې د همکارۍ ژمنې کړي دي.