تاند(شنبه، د جوزا ۷ مه) له هرات او ننګرهار ولايتونو څخه په دوه جلا راپورونو کې طالبان د ملکي مرګ ژوبلې مسوول ګڼل شوي.
د هرات د حوزوي روغتون سرچينې وايي، چې د هرات ښار د پینځمې ناحیې له پرونۍ پېښې چې د طالبانو رینجر موټر پر عامو خلکو ختلی، دوه جسدونه او ۹ ټپيان ورته راوړل شوي دي.
ويل شوي، چې په وژل شويو کې يو کراچۍ چلوونکی هم شامل دی.
طالبانو د دې پېښې په اړه څه نه دي ويلي، خو دا یې له بيا واکمنیدو سره په هرات کې د خپلې بڼې درېیمه پېښه ده.
د ننګرهار په سره رود ولسوالۍ کې بیا د طالبانو د یوه امنیتي چیک پینټ ساتونکو د واده پر کاروان ډزې کړي، چې د مرګ ژوبلې په اړه ضد او نقیض راپورونه ورکړل شوي دي.
ځينو سرچينو په دې ډزو کې د واده د ناوې په ګډون د څو تنو د مرګ ژوبلې خبر ورکړی، خو ځینې نور وايي چې د واده هلک، د هغه ورور او یو بل تن ټپیان شوي دي.
طالبانو د دې پېښې په اړه څه نه دي ويلي، خو خلکو پرې توند غبرګونونه پارولي دي.