تاند(چمعه، د جوزا ۶ مه) د ایران د ملي امنیت سلاکار علي شمخاني نن په دوشنبې کې د افغانستان په اړه د سیمه ییز امنیت کنفرانس ته وویل چې د سیمې ځینې هیوادونه افغانستان ته تکفري ډلې لېږدوي.
د شمخاني اشاره د اسلامي دولت یا داعش ته وه چې ایرانیان یې تکفره ډله بولي.
ده بې له دې چې د کوم ځانګړي هیواد نوم واخلي، د سیمې پر هیوادونو سربېره له سیمې ورهاخوا هیوادونه هم په دې کار کې په لاس لرلو تورن کړل.
د ایران د ملي امنیت سلاکار زیاته کړه چې هیواد یې تل په افغانستان کې د سولې او امنیت د ټینګېدو هڅه کړې ځکه چې باور لري چې په دې هیواد کې سوله او امنیت به د افغانانو او ټولې سیمې له پرمختګ او سوکالۍ سره مرسته وکړي.
شمخاني ادعا وکړه چې ایران اوس د شاوخوا ۵ ملیونه افغان کډوالو کوربه دی او اکثره یې له کلونو راهیسې د نړیوالو له مرستو پرته په ایران کې اوسي.
د هند د ملي امنیت سلاکار اجیت دوفل په سیمه ییز امنیتي دیالوګ کې وویل، پکار ده چې له تروریزم سره د مبارزې لپاره د افغانستان وړتیا لوړه کړل شي.
ده وویل، هند له افغانستان سره تاریخي او تمدني اړیکې لري، د هند حکومت تل د افغانانو ترڅنګ درېدلی او د افغانانو ملاتړ ته به دوام ورکړي.
هند د طالبانو له واک ته رسېدو او د افغانستان د اقتصادي وضعیت له خرابېدو له افغانستان سره د ۵۰ زره ټنه غنمو مرسته اعلان کړه چې یوه برخه یې افغانستان ته رسېدلې ده.
د هند د ملي امنیت سلاکار وویل، هیواد یې تل د افغانستان په قضایاوو کې یو مهم لوبغاړی و او د هغو تروریستي ډلو پر ضد، چې د سیمې امنیت ګواښي، د افغانستان د ظرفیتونو د لوړېدو غوښتونکی دی.
د افغانستان په اړه د سیمه ییز امنیتي دیالوګ غونډه نن د اتو هیوادونو د ملي امنیت د سلاکارانو په ګډون د تاجکستان په پلازمېنه دوشنبې ښار کې پیل شوه.
په دې غونډه کې د افغانستان پر امنیتي، سیاسي، اقتصادي او بشري وضعیت د نظرتبادله کېږي.
دا د افغانستان په اړه د سیمه ییز امنیتي دیالوګ څلورمه غونډه ده. لومړۍ دوې د ایران په کوربه توب او درېیمه دهند په کوربه توب جوړه شوې وه.
د دوشنبې په غونډه کې د هند، روسیې، چین، ایران او منځنۍ اسیا د هیوادونو د ملي امنیت سلاکاران برخه لري.