تاند(جمعه، د جوزا ۶ مه) د طالبانو واکمنۍ په نا مستقيمه توګه په تاجيکستان کې د افغانستان په اړه ترسره شوې پرونۍ غونډې ته منفي غبرګون ښودلی او ځينې سيمه ييز هېوادونه يې القاعدې او داعش ډلې ته په کمپاين تورن کړي دي.
د طالبانو تر کنټرول لاندې باختر خبري اژانس د تاجيکستان په کوربه توب د پرونۍ غونډې په غبرګون کې ويلي، چې داسې غونډې سمبوليکه او تبليغاتي بڼه لري.
د طالبانو تر واک لاندې دغه لومړنی افغان خبري اژانس په يوه تبصره کې د تاجيکستان د ولسمشر د څو ويناوو يادونه کړې، چې له افغانستان څخه پکې د سيمې امنيت ته د ګواښونو يادونه شوې وه.
باختر اژانس د ازبکستان، ترکمنستان، قزاقستان، ايران، روسیې او حتا خپله د تاجيکستان په اړه ادعا لري، چې افغانستان يې د سيمې امنيت ته ګواښ نه و بللی.
سرچینه زیاتوي، چې د طالبانو واکمني له سيمې سره ښه تعامل لري، خو ځينې هېوادونه د افغانستان په اړه د انديښنو په څرګندولو داعش او القاعده ډله لويه ښيي.
د باختر آژانس په تبصره کې د دغو تر نيوکو لاندې راغلو هېوادونو نومونه نه دي اخيستل شوي، خو ټينګار شوی چې دوی دې د « اوبو خړولو » پر ځای د طالبانو د سيمه ييز تعامل له طرحو سره چې باختر اژانس « شریفانه» ګڼلي، تعامل وکړي.
د تاجيکستان د پرونۍ غونډې په څنډه کې د هندوستان د ملي امنيت سلاکار په افغانستان کې د ترهګرو ډلو د بيرته فعاليدو په اړه انديښنه ښودلې وه.